5. Naalagaaffiup ingerlatai
2017-imi naalagaaffiup ingerlatai 1.210 mio. kr.-inik Kalaallit Nunaanni aningaasanik atuisimapput. 2016-imut sanilliullugu naalagaaffiup ingerlataani aningaasat atorneqartut 6,8 pct.-imik qaffassimapput taamani 1.133 mio. kr.-it naalagaaffimmit aningaasat atorneqarsimapput.
Titartakkami 3-mi 2017-imi naalagaaffiup ingerlataasa aningaasat atugaat suliaqarfinnut immikkoortiterneqarsimapput.
Titartagaq 3.
Naalagaaffiup aningaasartuutai sulianut immikkoortiterlugit 2017
Inuiaqatigiinni toqqissisimaneq isumannaassuserlu naalagaaffiup ingerlataanni annertunerpaajuvoq. Tassunga ilaapput, politeeqarneq, eqqartuussiveqarneq, parnaarussiveqarneq aamma inissiisarfeqarneq. 2017-imi inuiaqatigiinni toqqissisimaneq isumannaassuserlu naalagaaffiup 806 mio. kr.-inik naalagaaffiup atuiffigisimavai, naalagaaffiup aningaasanik atuinerisa 66,6 pct.-eralugit.
Illersornissaq naalagaaffiup ingerlataasa aningaasanik atuinerisa tullerivaat. Illersornissamut ilaapput; Arktisk Kommando, Slædepatruljen Sirius aamma Upalungaarsimasut (Beredskabsstyrelsen). 2017-imi illersornissamut aningaasat atorneqartut 212 mio. kr.-iupput, 2016-imut naleqqiullugu 12,0 pct.-imik qaffasinneruvoq. Illersornissamut aningaasat atorneqartut naalagaaffiup aningaasanik atuinerisa 17,5 pc t.-erivaat.
Nalinginnaasumik pisortat kiffartuussinerinut Søfartsstyrelsen, Kalaallit Nunaanni Naalagaaffiup Sinniisoqarfia aamma misissueqqaarnerit ilaapput tassunga ilaallutik Danmarks og Grønlands Geologiske Undersøgelser (GEUS) . 2017-imi nalinginnaasumik pisortat kiffartuussinerinut aningaasat atorneqartut 46 mio. kr.-iusimapput, naalagaaffiup aningaasanik atuinerisa 3,8 pct.-eralugit.
Naalagaaffiup ingerlataasa aningaasat atugaat sulisunut akissarsisitsinernut atuinernut aamma tunisassiornermi atuinermut tunnganerupput. Isertitat aningaasarsiorneq tunngavigalugu agguataarnerini sinneqartoorutitut naatsorsorneqarsimapput, Naalagaaffiup ingerlatai toqqaannartumik danskit naalagaaffiannit aningaasalersorneqartutut naatsorsuutigineqarnerat pissutaalluni.